غزل

غزل
از قلم :- کاشف شکیل

اے مری دل ربا ، اے مری دل رُبا
ظلمتوں میں ہے تو روشنی دل رُبا

تیرے یاقوتی لب کی نزاکت پہ یوں
سر جھکاتی رہے ہر کلی دل رُبا

تیرے دست حنائی کی خوشبو فقط
دل میں برپا کرے بے کلی دل رُبا

تیرے نینوں کا کاجل نہ بکھرے کبھی
عمر بھر وہ رہیں نرگسی دل رُبا

تیرے ہونٹوں پہ مسکان سجتی رہے
چشم نم ناک ہو نہ کبھی دل رُبا

میں ہوں محو سفر عشق کی راہ پر
تو ہی ہے مقصدِ زندگی دل رُبا

ہوں میں رطب اللساں تیری توصیف میں
گر چہ الفاظ سے ہوں تہی دل رُبا

جلوءہ حسن تیرا خدا کی قسم
دل لبھائے مرا ہر گھڑی دل رُبا

تیرے کاکل کبھی جو پریشان ہوں
مجھ پہ سایہ کریں اے مری دل رُبا

گیسو رخسار کو لمس کرتے رہیں
رُخ کا مطلع ہوں زلفیں تری دل رُبا

ڈر رہا ہے قلم تیری تعریف سے
رہ نہ جائے کہیں کچھ کمی دل رُبا

تجھ سے "کاشف" کا رشتہ رہے گا سدا
میں ہوں شاعر تو ہے شاعری دل رُبا